काठमाडौं – भारतीय क्रिकेट टोलीका पूर्वकप्तान कपिल देव र सुनील गावस्करसहित १४ पूर्वकप्तानले जेलमा रहेका पाकिस्तानका पूर्वप्रधानमन्त्री इमरान खानका लागि अपिल गरेका छन् ।
उनीहरूले पाकिस्तान सरकारसँग पूर्वपाकिस्तानी अलराउन्डर इमरान खानसँग जेलमा सम्मानजनक व्यवहार गर्न र उनलाई पर्याप्त चिकित्सा सुविधाहरू एवं कानुनी सहायता उपलब्ध गराउन अपिल गरेका छन् । साथै, उनलाई परिवारका नजिकका सदस्यहरूसँग भेट्न अनुमति दिन पनि माग गरिएको छ ।
टेस्ट खेल्ने पाँचवटा देशका १४ पूर्वकप्तानले पाकिस्तान सरकारलाई पत्र लेख्दै यो अपिल गरेका हुन् । यसरी पत्र लेख्नेहरूमा एलन बोर्डर, ग्रेग च्यापल, इयान च्यापल, नासिर हुसेन, बेलिन्डा क्लार्क र स्टिभ वा सामेल छन् ।
उनीहरूले पत्रमा लेखेका छन्, “उनको स्वास्थ्यसँग सम्बन्धित हालैका रिपोर्टहरू, विशेष गरी जेलमा रहँदा उनको दृष्टि क्षमतामा आएको चिन्ताजनक गिरावट र विगत साढे दुई वर्षमा उनको कैदको अवस्थाले हामीलाई गहिरो चिन्तामा पारेको छ ।”
इमरान खानका वकिलले गत हप्ता सर्वोच्च अदालतलाई जानकारी गराएका थिए कि जेलमा रहँदा खानको दाहिने आँखाको ज्योति निकै कम भएको छ ।
एउटा मेडिकल बोर्डले सोमबार बताएअनुसार, उपचारपछि उनको आँखाको सुन्निएको भाग कम भएको छ र आँखाको ज्योतिमा सुधार आएको छ ।
इमरान अगस्ट २०२३ देखि जेलमा छन् । उनीमाथि धेरै मुद्दाहरू चलिरहेका छन्, जसलाई उनले राजनीतिबाट प्रेरित भएको बताउँदै आएका छन् ।
