सर्लाही – मधेश प्रदेश प्रहरीले लागुऔषध प्रयोगकर्ता पहिचान, नियन्त्रण र सुधारका नाममा प्रदेशव्यापी ‘लागुऔषध सेवनकर्ता खोजी एवं सुधार महाअभियान २०८३’ सुरु गरेको छ ।
प्रदेश प्रहरी कार्यालयले आठै जिल्लाका प्रहरी प्रमुख तथा मातहत इकाइलाई निर्देशन दिँदै अभियान अघि बढाएको जनाएको छ । प्रहरी नायब महानिरीक्षक गोविन्द थपलियाले अभियानमार्फत लागुऔषध प्रयोग बढ्दो चुनौती बनेकाले खोजी निगरानी र सुधारलाई एकसाथ अघि बढाइने बताएका छन् ।
अभियानअन्तर्गत मधेशका सीमा नाकामा ‘ड्रग्स टेस्टिङ चेकपोइन्ट’ स्थापना गरिनेछ । त्यहाँ ड्रग टेस्ट किट प्रयोग गरेर लागुऔषध सेवन गरेको वा नगरेको परीक्षण गरिने प्रहरीले जनाएको छ । सीमामा नियमित आवतजावत गर्ने युवायुवतीको विवरण संकलन गरेर निगरानीसमेत बढाइने योजना छ ।
प्रहरीका अनुसार लागुऔषध सेवनकर्तालाई सीमाक्षेत्रमै एक घण्टासम्म सचेतनामूलक अडियो–भिजुअल सामग्रीमार्फत प्रशिक्षण दिइनेछ । उनीहरूको अभिलेख तयार पारिने र अवस्थाअनुसार निगरानीसमेत गरिने बताइएको छ ।
अभियान केवल नियन्त्रणमा सीमित नराखी सुधार र पुनर्स्थापनामा पनि केन्द्रित गरिएको प्रहरीको दाबी छ । त्यसका लागि प्रदेश सरकार, स्थानीय तह तथा सरोकारवाला निकायसँग समन्वय गरेर युवालाई लक्षित खेलकुद, मनोरञ्जन, सीपमूलक तालिम र रोजगार कार्यक्रम सञ्चालन गरिने योजना बनाइएको छ ।
यस्तै, लागुऔषध ओसारपसार, भण्डारण तथा कारोबारमा संलग्न समूह, व्यक्ति, औषधि पसल वा अन्य स्थानलाई निगरानीमा राखेर कडा कानुनी कारबाही गरिने प्रहरीले जनाएको छ ।
मधेश प्रदेशमा पछिल्ला वर्षहरूमा लागुऔषध प्रयोग र सीमापार कारोबार बढ्दै गएको गुनासोबीच प्रहरीले यसलाई विशेष अभियानका रूपमा अघि सारेको हो ।
