आज राष्ट्रिय सूचना दिवस मनाइँदै

काठमाडौं – नागरिकको सूचनाको हकप्रति सचेतना अभिवृद्धि गर्ने उद्देश्यले आज (बुधबार) राष्ट्रिय सूचना दिवस मनाइँदै छ। नेपालमा हरेक वर्ष भदौ ३ गते राष्ट्रिय सूचना आयोगको आयोजनामा यो दिवस मनाउने गरिन्छ।

नेपालमा सूचनाको हकसम्बन्धी ऐन, २०६४ साउन ५ गते प्रमाणीकरण भएको थियो। उक्त ऐन भदौ ३ गतेदेखि कार्यान्वयनमा आएको दिनको स्मरणमा प्रत्येक वर्ष राष्ट्रिय सूचना दिवस मनाइँदै आएको हो।

सूचनाको हक लोकतान्त्रिक शासन व्यवस्थाको महत्वपूर्ण आधारका रूपमा लिइन्छ। नागरिकले सार्वजनिक निकायका काम, निर्णय, योजना, बजेट तथा सेवासम्बन्धी जानकारी सहज रूपमा प्राप्त गर्न सकून् भन्ने उद्देश्यले सूचनाको हकसम्बन्धी कानुनी व्यवस्था गरिएको हो।

राष्ट्रिय सूचना दिवसले सार्वजनिक निकायलाई नागरिकप्रति थप पारदर्शी र जवाफदेही बन्न प्रेरित गर्ने तथा नागरिकलाई आफ्नो सूचनाको हक प्रयोग गर्न सचेत बनाउने अपेक्षा गरिएको छ।

यस अवसरमा राष्ट्रिय सूचना आयोगसहित विभिन्न निकायले सूचना अधिकारको प्रभावकारी कार्यान्वयन, पारदर्शिता र सुशासनका विषयमा विभिन्न कार्यक्रम आयोजना गर्दै आएका छन्।