रौतहट। लगातारको अविरल वर्षाका कारण रौतहट जिल्लाभरि धानबालीमा व्यापक क्षति पुगेको छ। पानीको उचित निकास नहुँदा भर्खरै रोपिएका धानका बिरुवाहरू डुबानमा परेका छन् भने किसानहरूको महिनौँको मेहनत र लगानी जोखिममा परेको छ।
जिल्लाका १८ वटै स्थानीय तहका अधिकांश धान खेत जलमग्न बनेका छन्। नदी, पोखरी र अन्य जलाशय आसपासका खेत मात्र नभई जिल्लाभरिका खेतीयोग्य जमिन डुबानमा परेका छन्। खेतमा जमेको पानीका कारण धानका बिरुवाहरू कुहिन थालेपछि किसानहरू थप चिन्तित बनेका छन्।
वृन्दावन नगरपालिकाका किसान कृष्ण देव पटेलले आफ्नो पाँच बिघाभन्दा बढी क्षेत्रफलमा लगाइएको धानबाली पूर्ण रूपमा डुबेको बताए। उनले दिनरात मेहनत गरेर रोपिएको धान वर्षाले नष्ट पारेपछि परिवारको जीविकोपार्जन नै संकटमा परेको गुनासो गरे।
वृन्दावन नगरपालिकाका प्रमुख विनोद कुर्मीले किसानहरूको समस्याप्रति नगरपालिका गम्भीर रहेको बताउँदै डोजरमार्फत खेतबाट पानी निकास गर्ने काम भइरहेको जानकारी दिए। उनले किसानलाई राहत तथा क्षतिपूर्ति उपलब्ध गराउने विषयमा कार्यपालिका बैठकमार्फत आवश्यक निर्णय गरिने बताए।
कृषि ज्ञान केन्द्र, गौरका अनुसार भारी वर्षा र डुबानका कारण जिल्लाका अधिकांश धान खेतमा ठूलो क्षति पुगेको छ। केन्द्रले सबै स्थानीय तहबाट क्षतिको विवरण संकलन भइरहेको जनाएको छ। प्रारम्भिक अनुमानअनुसार किसानहरूको करोडौँ रुपैयाँ बराबरको लगानी डुबेको छ।
कृषि प्राविधिकहरूका अनुसार डुबानको अवस्था लामो समयसम्म कायम रहे यस वर्ष रौतहटमा धान उत्पादनमा उल्लेख्य गिरावट आउन सक्ने र त्यसले खाद्य सुरक्षामा समेत असर पार्ने जोखिम रहेको छ।
किसानहरूले सरकारसँग तत्काल राहत, क्षतिपूर्ति तथा कृषि बिमा कार्यान्वयनलाई प्रभावकारी बनाउन माग गरेका छन्। उनीहरूले समयमै आवश्यक सहयोग नपाए आगामी वर्ष धान खेती नै गर्न कठिन हुने चेतावनी दिएका छन्।
