२४,वैशाख,काठमाडौँ, लोकसंगीत संकलन, खोज अनुसन्धानमा सात दशक बिताएका कुमार बस्नेतलाई रेडियो कान्तिपुरको २३ औं वार्षिकोत्सवको अवसरमा आयोजित नेसनल म्युजिक अवार्डस्मा दीर्घसाधना सम्मान २०७८ (लाइफ टाइम अचिभमेन्ट) दिइएको छ ।
कान्तिपुर मिडिया गु्रपका अध्यक्ष कैलाश सिरोहियाले वर्षभरि बजाउँदै आएको गीतको स्रष्टालाई रोयल्टी प्रदान गर्दै आएको रेडियो कान्तिपुरले संगीत क्षेत्रका बस्नेतजस्तो नक्षत्रलाई ’लाइफ टाइम अचिभमेन्ट’ प्रदान गर्न पाउँदा खुसी व्यक्त गरे ।
कार्यक्रममा गायक सुरजकुमार थापा, धर्मेन्द्र सेवानले दीर्घकालीन सम्मानबाट सम्मानित बस्नेतमा ’तिम्रो बाउलाई सलाम छ’, ’भाले बास्यो पियारी’, ’हेर्दा राम्रो माछापुच्छ्रे’ लगायतका गीतमाथि गायन प्रस्तुति दिए । ’पिपुल्स च्वाइस’ अवार्डबाट गायक निशान भट्टराई र एलिना चौहान ’के माया लाग्छ र’ बोलको गीतबाट सम्मानित भए । नवप्रतिभातर्फ अंकित अमारु श्रेष्ठ ’लजनएर’ बोलको गीतबाट सम्मानित भए ।
अवार्ड कार्यक्रममा कवि कुमार नगरकोटीले कविता प्रस्तुत गरे । त्यस्तै, गायक यम बराल, लोचन भट्टराई, समृद्धि राई, गायिका त्रिशाला गुरुङ, दिनेश ढकाल, शिवानी तामाङलगायतले गायन प्रस्तुति दिए । प्रस्तोता एवं हास्य कलाकार दीपक क्षेत्रीले पनि हास्यव्यंग्यको प्रस्तुति दिए ।
१५ क्याटोगोरीमा प्रदान गरिएको यो अवार्डमा ७५ जना मनोनयनमा परेका थिए । अर्जुन पोखरेलले संगीत निर्देशकको अवार्ड पाउँदा लोकगायकमा पशुपति शर्माले अवार्ड पाए । त्यस्तै पार्श्व गायकतर्फ रामकृष्ण ढकालले अवार्ड प्राप्त गर्दा मिलन नेवारले पार्श्व गायिकाको अवार्ड पाइन् ।
