काठमाडौं । प्रसिद्ध व्यवसायी शेखर गोल्छासँग सम्पत्ति शुद्धीकरणसम्बन्धी मुद्दामा विशेष अदालतले एक करोड रुपैयाँ धरौटी माग गरेको छ।
मंगलबार विशेष अदालतमा भएको थुनछेक बहसपछि गोल्छासँग एक करोड रुपैयाँ धरौटी माग गर्ने आदेश जारी भएको हो। अदालतमा उपस्थित गराएर बकपत्र गराएपछि न्यायाधीशहरू बासुदेव आचार्य, हेमन्त रावल र विदुर कोइरालाको इजलासले उक्त आदेश दिएको बताइएको छ।
यसअघि गत साउन १२ गते काठमाडौं जिल्ला अदालतले पनि गोल्छालाई विभिन्न कसुरमा कुल एक करोड रुपैयाँ धरौटी माग गरेको थियो। अदालतले बीमासम्बन्धी कसुरमा ७५ लाख रुपैयाँ र धितोपत्रसम्बन्धी कसुरमा २५ लाख रुपैयाँ धरौटी माग गरेको थियो।
उक्त धरौटी बुझाएपछि गोल्छा रिहा भएका थिए। पछिल्लो आदेशसँगै उनीविरुद्धका कानुनी प्रक्रियामा सम्पत्ति शुद्धीकरणसम्बन्धी मुद्दा पनि थप अघि बढेको छ।
