भक्तपूर-।पूर्वप्रधानमन्त्री एवं वरिष्ठ साहित्यकार लोकेन्द्रबहादुर चन्दलाई सामूहिक रूपमा अभिनन्दन गरिएको छ ।
तारा किशन फाउण्डेशन, साहित्यिक पत्रकार संघ, नेपाल स्रष्टा समाजको संयोजनमा एकसय एक संस्थाले भक्तपुर ठिमीमा एक विशेष कार्यक्रमबीच उहाँको अभिनन्दन गरेका हुन् ।
साहित्यिक पत्रकार संघका अध्यक्ष राधेश्याम लेकालीको सभापतित्वमा भएको कार्यक्रममा अध्यक्ष लेकाली, तारा किशन फाउण्डेशनका संरक्षक किशनसिंह धामी र नेपाल स्रष्टा समाजका अध्यक्ष श्रीओम श्रेष्ठ ‘रोदन’ले उहाँ र उहाँकी धर्मपत्नीलाई दोसल्ला दुवोको माला टोपी लगाएर अभिनन्दन गर्नुभएको थियो ।
कार्यक्रममा साहित्यकार प्रमोद प्रधानले चन्दका बारेमा विस्तृत परिचय राख्नुभएको थियो । अध्यक्ष लेकालीले कार्यक्रमका विषयमा आफ्ना भनाइ राख्नुभएको थियो । यस्तै, श्रीओम श्रेष्ठ’ रोदन’ ले अभिनन्दन पत्र वाचन गर्नुभएको थियो ।
वरिष्ठ साहित्यकार चन्दले अख्यान र निबन्ध सिर्जनाका माध्ययमबाट नेपाली समाज रूपान्तरणका लागि महत्वपूर्ण योगदान पु¥याएको भन्दै उहाँलाई अभिनन्दन गरिएको पत्रमा उल्लेख छ ।
नेपाली राजनीति र साहित्यका क्षेत्रमा सुप्रसिद्ध चन्द विभिन्न समयमा चार पटक नेपालका प्रधानमन्त्री बन्नुभएको छ । उहाँ कुशल शब्द-शिल्पी हुनुहुन्छ । मदन पुरस्कारसहित विभिन्न मानसम्मान र पुरस्कारले विभूषित चन्द शालीन, सादगी र भद्र राजनीतिज्ञ मानिनुहुन्छ ।
उहाँको व्यक्तित्व राजनीतिसँगै साहित्यमा उच्च छ । कुशल साहित्यकार उहाँका एक दर्जन साहित्यिक कृति प्रकाशित छन् भने केही पुस्तक प्रकाशनको तयारीमा छन् ।
