सिन्धुपाल्चोक –नेपाली कांग्रेसभित्रै चुनावी ‘अन्तर्घात’ को आरोपले नयाँ विवाद चर्किएको छ । प्रतिनिधिसभा निर्वाचनमा आधिकारिक उम्मेदवारलाई हराउन भूमिका खेलेको आरोपमा पूर्वकेन्द्रीय सदस्य मोहनबहादुर बस्नेतसहित ११ जना नेताविरुद्ध कारबाहीको सिफारिस गरिएको छ।
जिल्ला सभापति तथा क्षेत्र नम्बर १ का उम्मेदवार जंगबहादुर लामाले केन्द्रीय अनुशासन आयोगमा औपचारिक रूपमा सिफारिस पठाइएको जानकारी दिएका छन् ।कारबाही सिफारिसमा परेकामध्ये पूर्व केन्द्रीय सदस्य बस्नेतसँगै बाह्रबिसे नगरपालिकाका मेयर तथा क्षेत्रीय सभापति बालकृष्ण बस्नेत, बागमती प्रदेशसभा सदस्य मसिना खड्का भण्डारी र सुनकोशी गाउँपालिकाका पूर्व अध्यक्ष श्रवणकुमार जिसी रहेका छन्।यसैगरी अन्य नेताहरू रामकुमार थापा, निमा जाङ्बो शेर्पा, सुवास तिमिल्सिना, लालाकाजी तामाङ, जेठा लामा (जोगलाल) र रवि थिङसमेत सिफारिसमा परेका छन्।
जिल्ला कार्यसमितिका अनुसार क्षेत्र नम्बर १ मा निर्वाचनका क्रममा पार्टी उम्मेदवारविरुद्ध काम गर्ने, असहयोग गर्ने र मत विभाजन गराउने गतिविधिमा संलग्न रहेको आरोप उनीहरूमाथि लागेको छ। अब केन्द्रीय अनुशासन आयोगले छानबिनपछि कारबाही प्रक्रिया अघि बढाउनेछ।
Discussion about this post