काठमाडौं – युक्रेन र रुसबीच अमेरिकाको मध्यस्थतामा जेनेभामा भइरहेको वार्ता समाप्त भएको छ । वार्तामा केही प्रगति भए पनि दुवै पक्ष सबैभन्दा प्रमुख मुद्दा ‘भूभाग नियन्त्रण’को विषयमा सहमतिमा पुग्न सकेका छैनन् ।
चार वर्षदेखि चलिरहेको युद्ध रोक्नका लागि अमेरिकाले दबाब दिइरहेको छ । युद्धमा दसौँ हजार मानिसको मृत्यु भइसकेको छ । पूर्वी र दक्षिणी युक्रेनको ठूलो हिस्सा ध्वस्त भएको छ ।
यद्यपि, युद्धपछि कुन जमिन कसले पाउने भन्नेमा युक्रेन र रुस सहमत हुन सकिरहेका छैनन् ।
रुस युक्रेनको पूर्वी दोनेत्स्क क्षेत्रमा पूर्ण नियन्त्रण चाहन्छ । उसले वार्तामार्फत यो क्षेत्र नपाए शक्ति प्रयोग गरेरै हासिल गर्ने बताएको छ । युक्रेनले रुसको यो मागलाई खारेज गरिदिएको छ ।
युक्रेनले रुसले आफूमाथि फेरि कहिल्यै आक्रमण नगर्ने ‘सुरक्षा ग्यारेन्टी’ नपाएसम्म कुनै पनि सम्झौतामा हस्ताक्षर नगर्ने अडान लिएको छ ।
वार्ता सकिएपछि जेलेन्स्कीले पत्रकारसँग दुवै पक्ष युद्धविरामसँग सम्बन्धित लगभग सबै मुद्दामा सहमत भए पनि अनुगमन संयन्त्र आवश्यक रहेको बताए । उक्त संयन्त्रमा अमेरिका पनि सामेल रहने जानकारी दिए ।
जेलेन्स्कीका अनुसार युक्रेनको पूर्वी हिस्सामा कब्जा गरिएका क्षेत्र र रुसी कब्जामा रहेको झापोरिझिया आणविक प्लान्टको भविष्यका बारेमा भने सहमति हुन सकेको छैन । एजेन्सी
