काठमाडौं, चैत्र, १, तिनकुने, सुविधानगरस्थित हिमालयन ह्वाइट हाउस इन्टरनेसनल कलेजले दुई दिने …ह्वाइट हाउस लिटरेचर फेस्टिबल’ सुरु गरेको छ ।
आजका युवा भोलिका कर्णधार मात्र नभएर वर्तमान समयको शक्तिशाली समूह हुन् । उनीहरुलाई आजको राजनीति, शिक्षा, साहित्य, संगीत र सिनेमा जस्ता पक्षमा समेत जागरुक बनाउनुपर्छ भन्ने उद्देश्यले कलेजले मंगलबारदेखि फेस्टिबल सुरु गरेको हो । कलेजका अनुसार फेस्टिबलमा राजनीति, शिक्षा, साहित्य, संगीत र सिनेमा बहस तथा छलफल गरिनेछ ।
फेस्टिबलको पहिलो दिन अभिनेता राजेश हमालदेखि साहित्यकार नयनराज पाण्डे, सिनेकर्मी मीन भाम, गायिका इन्दिरा जोशी, युवा नेताहरु मानुषी यमी भट्टराई, सुरेन्द्र बस्नेत लगायतकाले अहिलेको राजनीति, शिक्षा, साहित्य, संगीत र सिनेका विषयमा परिचर्चा गर्दै युवा पुस्तालाई यसतर्फ केन्द्रित गर्न चाल्नुपर्ने कदमहरुबारे उल्लेख गरे ।
अभिनेता हमालले स्वभावले नै मानिसको रुचि अर्काे मान्छे बन्ने प्रयत्नमा हुने सुनाउँदै आफूबाट अरुले केही ग्रहण गरुण भन्ने शब्द र अभिव्यक्ति चयन हुनुपर्ने धारणा राखे । …अरुले के भन्ला, के सोच्ला भनेर नै हामी सोचिरहेका हुन्छौं, उनले भने, …सबैले मलाई नै सम्बोधन गरोस् भन्ने भ्रम हो । आफूसँग सम्बन्धित कुरा हेर्नेहरुले पाउनुहुन्छ कि हुन्न भन्ने मुख्य हुन्छ । साहित्यलाई युवा पुस्ताको भावना प्रकट गर्ने सशक्त माध्यम भएको सुनाउँदै उनले यसले गुम्सिएको भावनाबाट मुक्त गराउने सुनाए । युवा नेताहरु भट्टराई लगायतकाले ‘राजनीतिमा युवा’ सेसनमा अहिलेको राजनीतिले युवा पुस्ताका मुद्दालाई सम्बोधन गर्न नसकेको धारणा राखे । युवामैत्री, युवालाई अनुमोदन गर्ने, उमेरहद जस्ता नीतिगत प्रणाली राजनीतिमा नभएकाले यसतर्फ युवा पुस्ताको वितृष्णा बढेको भट्टराईले सुनाईन् ।
सर्जकहरु पाण्डे, भाम र जोशीले भने ‘संगीत, साहित्य र अभिनय’ सेसन अन्तर्गत नेपाली साहित्य, संगीत र सिनेमाका बारेमा चर्चा गरे । पाण्डेले समय र समाज परिवर्तन अनुसार नेपाली साहित्य अगाडि बढिरहेको सुनाए । उनले भने, ‘अहिले साहित्यमा युद्ध, वैदेशिक रोजगार, महामारी जस्ता मनलाई स्पर्श गर्ने धेरै विषयहरु आएका छन् । अहिलेको साहित्य समय अनुकुल नै आइरहेका छन् ।’ भामले मौलिक नेपाली सिनेमाको परिचर्चा गर्दै गर्दा गायिका जोशीले संगीतमा प्रविधिले मारेको फड्कोलाइ जोडिन् । हास्यकलाकार राजा राजेन्द्रले हास्यव्यंग्य प्रस्तुत दिएका थिए । फेस्टिबल बुधबारसम्म चल्नेछ ।
