कांग्रेसमा गुटबन्दी अन्त्य गर्न युवा नेताहरूको

काठमाडौं — नेपाली कांग्रेसभित्रको आन्तरिक कलह अन्त्य गर्दै पार्टीलाई जनमुखी, वैचारिक र एकताबद्ध बनाउने उद्देश्यसहित युवा नेताहरूले ‘देश र कांग्रेस जोड्ने अभियान’ अन्तर्गत ‘राष्ट्रिय संकल्प’ सार्वजनिक गरेका छन्।

बुधबार आयोजित ‘एकता–सद्‌भाव विमर्श: २०८३’ कार्यक्रममा पार्टीका विभिन्न तहका नेताहरूले कांग्रेसलाई गुटबन्दीबाट मुक्त गर्दै बीपी कोइरालाको मेलमिलापको नीति र प्रजातान्त्रिक समाजवादको आधारमा पुनर्गठन गर्नुपर्नेमा जोड दिएका हुन्।

कार्यक्रममा प्रस्तुत प्रतिवेदनमा बीपी कोइरालाको ‘कांग्रेस एउटै ठूलो परिवार हो’ भन्ने अवधारणालाई आत्मसात गर्नुपर्ने उल्लेख गर्दै विचारमा विविधता भए पनि पार्टीप्रतिको साझा विश्वास कायम रहनुपर्नेमा जोड दिइएको छ। साथै, वर्तमान कांग्रेस सबैका लागि खुला र समावेशी रहन सकेको छ वा छैन भन्ने प्रश्नसमेत उठाइएको छ।

युवा नेताहरूले मुलुकमा बढ्दो भ्रष्टाचार, युवा पलायन, किसानका समस्या तथा शिक्षित युवामा बढ्दो निराशाको समाधान गुटबन्दी वा पदको प्रतिस्पर्धाबाट नभई एकताबद्ध, जनउत्तरदायी र सशक्त कांग्रेसबाट मात्रै सम्भव हुने निष्कर्ष प्रस्तुत गरेका छन्। प्रतिवेदनमा इतिहासलाई केवल पढ्ने विषय नभई नयाँ इतिहास निर्माण गर्ने जिम्मेवारीका रूपमा लिनुपर्ने उल्लेख गरिएको छ।

कांग्रेस युवानेता नैनसिंह महरका अनुसार कार्यक्रममा पार्टीलाई विभाजन हुन नदिने, लोकतन्त्रलाई कमजोर हुन नदिने, युवाको आशा र जनताको विश्वास जोगाउने तथा व्यक्तिभन्दा विचार र संगठनभन्दा माथि राष्ट्रहितलाई प्राथमिकता दिने सामूहिक प्रतिबद्धता व्यक्त गरिएको छ।

प्रतिपक्षको भूमिका केवल विरोधमा सीमित नराखी सरकारलाई उत्तरदायी बनाउने र राष्ट्रलाई समाधान दिने राजनीतिक शक्तिका रूपमा कांग्रेसलाई स्थापित गर्नुपर्नेमा पनि कार्यक्रममा जोड दिइएको थियो।

‘देश र कांग्रेस जोड्ने अभियान’मा राष्ट्रियसभा सदस्य रञ्जित कर्ण, निवर्तमान केन्द्रीय सदस्य नैनसिंह महर, युवा नेताहरू पुष्पराज शाही, राजेन्द्र तिवारी, राजनीतिक विश्लेषक अरुण सुवेदी, नेताहरू आनन्द त्रिपाठी, लीलाबल्लभ दाहाल ‘काका’, मनहरि श्रेष्ठ, रजनी, आनन्द सन्तोषी राई तथा डा. यज्ञप्रसाद न्यौपानेलगायतको सहभागिता रहेको थियो।

कार्यक्रमको समापनमा सहभागी नेताहरूले पार्टीभित्र पुस्ता जोड्ने, विवादभन्दा विश्वासलाई प्राथमिकता दिने तथा कांग्रेसको एकतामार्फत देशको भविष्य निर्माणमा योगदान पुर्‍याउने प्रतिबद्धता व्यक्त गरेका थिए।