संघीयता, धर्मनिरपेक्षता र समावेशिता कमजोर पार्ने दिशामा सरकार : आङ्देम्बे

उनले भनेका छन्, ‘सरकारका पछिल्ला गतिविधि र अभिव्यक्तिहरू संघीयता, धर्मनिरपेक्षता, समावेशिता र लोकतान्त्रिक गणतन्त्रलाई बलियो बनाउनेभन्दा कमजोर बनाउने दिशातर्फ त उन्मुख छैनन् भन्ने महसुस हुन थालेको छ।’

आङ्देम्बेले संविधानले सुनिश्चित गरेका राजनीतिक उपलब्धि कुनै दल वा सरकारको दया–कृपाबाट प्राप्त नभएको स्पष्ट पारेका छन्। उनका अनुसार संघीयता, धर्मनिरपेक्षता, समानुपातिक समावेशिता, सामाजिक न्याय तथा पहिचान र सांस्कृतिक अधिकार नेपाली जनताको लामो संघर्ष, त्याग र बलिदानबाट प्राप्त उपलब्धि हुन्।

उनले संघीयतालाई ‘बोझ’का रूपमा चित्रित गर्ने, प्रदेश संरचनामाथि प्रश्न उठाउने तथा समानुपातिक प्रतिनिधित्व कमजोर बनाउने किसिमका बहसप्रति समेत असन्तुष्टि जनाएका छन्।‘कमजोरी छन् भने सुधार गरौँ। समस्या छन् भने समाधान गरौँ। तर जनताको संघर्षबाट प्राप्त उपलब्धि नै मास्ने कुरा स्वीकार्य हुन सक्दैन,’ आङ्देम्बेले भनेका छन्।उनले आदिवासी जनजाति समुदायको पहिचान, भाषा, संस्कृति र अधिकारलाई संविधानमा मात्रै सीमित नराखी व्यवहारमै सुनिश्चित गर्नुपर्नेमा जोड दिएका छन्।राज्यका सबै तहमा न्यायपूर्ण प्रतिनिधित्व सुनिश्चित गर्दै पहिचानसहितको संघीयतालाई संस्थागत र प्रभावकारी बनाउनुपर्ने उनको भनाइ छ।आङ्देम्बेले विश्व आदिवासी दिवसले समावेशी, समान र न्यायपूर्ण नेपाल निर्माणको संकल्पलाई थप बलियो बनाउने विश्वास व्यक्त गर्दै सम्पूर्ण आदिवासी जनजाति समुदायमा शुभकामनासमेत दिएका छन्।