काठमाडौं – चर्चित भारतीय गायक नवजोत आहुजा सांगीतिक प्रस्तुतिका लागि नेपाल आएका छन्। उनी मंगलबार साँझ काठमाडौं आइपुगेका हुन्। आहुजाले आज साँझ राजधानीमा आयोजना हुने सांगीतिक कार्यक्रममा आफ्ना चर्चित गीत प्रस्तुत गर्नेछन्।
कार्यक्रममा उनले ‘तेरे लिए मंदिर जाऊँ, तेरे नाम का दिया जलाऊँ’ लगायत आफ्ना लोकप्रिय गीतमार्फत दर्शकलाई मनोरञ्जन दिनेछन्। उक्त गीत उनको सांगीतिक यात्राको चर्चित गीतमध्ये एक हो, जुन ‘खत’ एल्बममा समावेश छ।
आहुजाका ‘तू ही हूँ’, ‘खुद से मोहब्बत’, ‘इंतज़ार’, ‘मेरे हो तुम’ र ‘चले गए’ लगायत गीत पनि चर्चित छन्।
नेपाल पहिलोपटक आएका आहुजाले विमानस्थलमा सञ्चारकर्मीसँग कुरा गर्दै नेपाली दर्शकमाझ प्रस्तुति दिन आफू उत्साहित रहेको बताए।
‘म पहिलोपटक नेपाल आएको हुँ। मलाई नेपाल मन पर्छ। नेपाली संस्कार र संस्कृति राम्रो लाग्छ,’ उनले भने, ‘नेपाली दर्शकमाझ आफ्नो प्रस्तुति दिन म निकै उत्सुक छु।’ आहुजाले नेपाली संगीतप्रति समेत आफ्नो रुचि रहेको बताए। आफूले नेपाली गीतहरू सुन्ने गरेको उल्लेख गर्दै कुनै नेपाली संगीतकारले गीत गाउन प्रस्ताव गरे आफू सहकार्यका लागि तयार रहेको उनको भनाइ छ।
आहुजा नेपालमा तीन दिन रहनेछन्। यस क्रममा उनले काठमाडौंका विभिन्न धार्मिक तथा पर्यटकीय स्थलको भ्रमण गर्ने कार्यक्रम रहेको छ। नेपाल भ्रमणका क्रममा सांगीतिक प्रस्तुति र पर्यटन दुवैलाई प्राथमिकता दिएका आहुजाले नेपाली दर्शकसँग प्रत्यक्ष भेटघाट र सांगीतिक सम्बन्ध विस्तार गर्ने अवसरका रूपमा आफ्नो नेपाल आगमनलाई लिएका छन्।
