काठमाडौं –पाकिस्तानका रक्षामन्त्री ख्वाजा आसिफले अफगान तालिवानविरूद्ध ‘खुला युद्ध’को घोषणा गरेका छन् । पाकिस्तानी रक्षामन्त्रीले अफगान तालिवानलाई चेतावनी दिँदै भनेका छन्– हाम्रो धैर्य समाप्त भइसक्यो । अब खुला युद्ध हुन्छ ।बीबीसी उर्दुका अनुसार सोशल मिडिया प्लेटफर्म एक्समा जारी बयानमा उनले अफगान तालिवानमाथि ‘अफगानिस्तानमा विश्वभरबाट आतंकवादीहरू एकत्रित गरेको आरोप लगाएका छन् ।
काबुलमा अन्तरिम सरकारले आतंकवाद निर्यात गरेको पाकिस्तानी रक्षामन्त्री आसिफको आरोप छ ।
अफगानिस्तानमा तालिवान सरकारका प्रवक्ता जबिहुल्लाह मुजाहिदले पाकिस्तानद्वारा राजधानी काबुल, पक्तिका र कन्धारका केही स्थानहरूमा बमबारी भएको पुष्टि गरेका छन् । उनले आक्रमणबाट कुनै हताहती भने नभएको बताएका छन् ।
पाकिस्तानी रक्षामन्त्री आसिफले अफगान तालिवानले आफ्नो मुलुकका नागरिकलाई मानवाधिकारबाट वञ्चित गरेको र इस्लामले महिलालाई दिएको अधिकार खोसेको पनि आरोप लगाएका छन् ।
बीबीसी उर्दुका अनुसार पाकिस्तानी सरकारले अहिलेसम्म सैन्य अभियानका क्रममा अफगान तालिवानका १३३ सदस्य मारिएका र दुई सय घाइते भएका दाबी गरेको छ ।
पाकिस्तानका सूचनामन्त्री अताउल्लाह तरारले एक्समार्फत् अफगानिस्तानका काबुल, पक्तिका र कन्धारमा रहेका अफगान तालिवानका रक्षा स्थललाई निशाना बनाइएको बताएका छन् ।
उनले पाकिस्तानको अभियानमा अफगान तालिवानका दुई कोर मुख्यालय, दुई हतियार डिपो, एक लजिस्टिक्स गोदाम, तीन बटालियन मुख्यालय, दुई सेक्टर मुख्यालय र ८० भन्दा बढी ट्यांक नष्ट गरिएको पनि दाबी गरेका छन् ।
यद्यपि, बीबीसी हिन्दीले दाबीको स्वतन्त्र रूपले पुष्टि गर्न नसकिएको बताएको छ । पाकिस्तानी सूचनामन्त्री अताउल्लाहले पाकिस्तानका तर्फबट अफगान तालिवानविरूको अभियान अहिले पनि जारी रहेको उल्लेख गरेका छन् ।
अबेर रातिदेखि विष्फोटको आवाज
समाचार एजेन्सी एएफपीका अनुसार बिहानै अफगानिस्तानको राजधानी काबुलमा ठूलो विष्फोटको आवाज आएको छ । समाचार एजेन्सीका अनुसार राति करिब १.५० बजे पूरै शहरमा लडाकु विमानहरूको आवाजका साथै विष्फोटको आवाज सुनिएको थियो । यस्तै सेन्ट्रल काबुलमा बिहान करिब २.३० बजेसम्म गोली चलेको आवाज सुनिएको छ ।
काबुल र कन्धारमा भएको आक्रमण पाकिस्तान र अफगानिस्तानबीच विगत केही समयदेखि चल्दै आएको झडपको ऋंखलामा सबैभन्दा नयाँ हो । दुवै देश अक्टोबर २०२५ मा युद्धविरामका लागि सहमत भएका थिए ।
पछिल्लो साता पाकिस्तानले अफगानिस्तानमा रातभर हवाई आक्रमण गरेको थियो । तालिवानले उक्त आक्रमणमा परी महिला र बालबालिका गरी १८ जनाको मृत्यु भएको थियो ।
एकअर्कामाथि आरोप
पाकिस्तानी र अफगान सेना एक–अर्कामाथि पहिले आक्रमण सुरू गरेको आरोप लगाउँदै आएका छन् । दुवै देशका सेनाहरू एक–अर्कालाई ठूलो क्षति पुर्याइएको पनि दाबी गर्दै आएका छन् ।
पाकिस्तानी अधिकारीहरूले शुक्रबार पनि अफगान आक्रमणको जवाफामा काबुल र कन्धारसमेतका शहरहरूमा ‘काउन्टर स्ट्राइक’ गरिएको दाबी गरेका छन् । अफगान तालिवानले यो साताको सुरूवातमा भएको आक्रमणको जवाफमा व्यापक रूपमा अपरेशन गरिएको बताएको छ । उसले अपरेशनका क्रममा कमितमा पनि १८ जना मारिएका पनि दाबी गरेको छ ।
तालिवानका सैन्य प्रवक्ता वहिदुल्लाह मोहम्मदीले भने, ‘जवाफी अपरेशन बिहीबारे स्थानीय समयअनुसार राति करिब ८ बजेबाट सुरू गरिएको थियो ।’
मुख्य प्रवक्ता जबिहुल्लाह मुजाहिदले जवाफी कारबाहीमा पाकिस्तानी सैनिक मारिएका र अन्य कयौंलाई पक्राउ गरिएको दाबी गरेका छन् । तर, पाकिस्तानी अधिकारीहरूले उक्त दाबी अस्वीकार गरेका बीबीसीले जनाएको छ ।
ताजा संघर्षको सुरूवात
अफगानिस्तानका पूर्व राष्ट्रपति हामिद करजईले काबुल, कन्धार र पक्तिकामा भएको पाकिस्तानी आक्रमणको निन्दा गरेका छन् । उनले एक्समा एक पोस्ट गर्दै लेखेका छन्, ‘अफगानिस्तानका नागरिक एकताका साथ आफ्नो धर्तीको रक्षा गर्ने छन् र साहसका साथ आक्रामकतालाई जवाफ दिनेछन् ।’
पाकिस्तान र अफगान तालिवानबीच संघर्षको सुरूवात गत वर्ष ७–८ अक्टोबरको रातिबाट भएको थियो । त्यो बेला पाकिस्तानी सेनाले ओरकजईमा गुप्तचरको जानकारीका आधारमा कारबाही गरिएको प्रतिक्रिया दिएको थियो ।
८ अक्टोबरमै पाकिस्तानी रक्षामन्त्री आसिफले संसदमा भनेका थिए, ‘सरकार र सेनाको धैर्य समाप्त भइसकेको छ । चरमपन्थीहरूलाई शरण दिनेले अब नतिजा भोग्नु पर्नेछ ।’
पाकिस्तान लामो समयदेखि अफगानिस्तानको तालिवान सरकारसँग प्रतिबन्धित तहरिक–ए–तालिबान पाकिस्तान (टीटीपी) विरूद्ध कारबाहीको माग गर्दै आएको छ । पछिल्लो समय यो माग अझै तीब्र भएको छ ।
उक्त घटनापछि दुई पक्षबीच लगातार तनाव बढ्दै गएको छ । तनाव कम गर्न दुई देशबीच शान्ति वार्ता र सम्झौता पनि भएको छ । तर, संघर्ष समाप्त भएको छैन । एजेन्सी
