काठमाडौं – नेपाल आयल निगमले होटेल, रेस्टुरेन्ट तथा पार्टी प्यालेसजस्ता व्यावसायिक प्रतिष्ठानलाई आवश्यकताभन्दा बढी एलपी ग्यास सिलिन्डर भण्डारण नगर्न निर्देशन दिएको छ।
बिहीबार सूचना जारी गर्दै निगमले बजारमा ग्यासको कृत्रिम अभाव सिर्जना हुन नदिन अनावश्यक रूपमा सिलिन्डर थुपारेर नराख्न सम्बन्धित व्यवसायीलाई सचेत गराएको हो।
निगमका अनुसार साविकको तुलनामा करिब २० प्रतिशत बढी एलपी ग्यास आयात तथा बिक्री वितरण भइरहेको छ। गत असार ३१ गतेदेखि नै १४.२ किलोग्रामका भरिएका सिलिन्डर सहज रूपमा बजारमा पठाइरहेको निगमले जनाएको छ।
तर, सर्वसाधारण उपभोक्ताले बजारमा सहज रूपमा ग्यास नपाएको गुनासो बढेपछि निगमले यस विषयलाई गम्भीरतापूर्वक लिएको जनाएको छ।
निगमको द्रुत प्रतिकार्य (क्विक रेस्पोन्स) डेस्कमा प्राप्त उजुरी तथा सूचनाका आधारमा गरिएको बजार अनुगमनका क्रममा केही ठूला होटेल, रेस्टुरेन्ट र पार्टी प्यालेसले आवश्यकताभन्दा अत्यधिक संख्यामा ग्यास सिलिन्डर भण्डारण गरेर राखेको पाइएको थियो।
अनुगमनका क्रममा भेटिएको अवस्थालाई आधार बनाउँदै निगमले त्यस्ता व्यावसायिक प्रतिष्ठानलाई अनावश्यक रूपमा ग्यास भण्डारण नगर्न निर्देशन दिएको छ। यसअघि नै मौज्दात राखिएका अतिरिक्त ग्यास सिलिन्डर तत्काल सम्बन्धित डिपोमार्फत सर्वसाधारण उपभोक्तालाई बिक्री वितरण गर्ने व्यवस्था मिलाउनसमेत निगमले कडा निर्देशन दिएको छ। बजारमा ग्यासको आपूर्ति पर्याप्त रहेकाले अनावश्यक भण्डारण तथा कृत्रिम अभाव सिर्जना हुने गतिविधि नगर्न निगमले सम्बन्धित सबै पक्षलाई आग्रह गरेको छ।
Discussion about this post