मुगु । मुगुस्थित पूर्वी क्षेत्रमा पर्ने मुगुम कार्मारोङ गाउँपालिकाको माथिल्लो बस्तीमा अत्याधिक चिसो बढेपछि करिब १ सय २० परिवारले गाउँ छोडेका छन् ।
कार्मारोङ गाउँपालिकाको वडा नम्बर २ मुगु गाउँमा हावासँगै अत्याधिक जाडो बढेपछि गाउँमा बस्न नसक्ने अवस्था आएको स्थानीयले बताएका छन् । घरमा ताला लगाएर सम्पूर्ण स्थानीय बाहिरिएको गाउँपालिका अध्यक्ष छिरिङक्याप्ने लामाले बताउनुभयो ।
उहाँका अनुसार गाउँको हेरचाहा र मालमसानको सुरक्षा गर्ने दुई तीन जनाबाहेक अन्य सबै चौपाय वस्तुसहित विभिन्न स्थानमा गएका हुन् । यसरी कार्मारोङ गाउँका स्थानीय मुगुकै सिरानचौर, चितै तिहार बगर, गमगढी गएका छन् भने केही जुम्ला, नेपालगञ्ज र काठमाडौंसम्म गएका छन् ।
समुद्री सतहदेखि करिब ३३ सय मिटर उचाइमा रहेको मुगु गाउँका स्थानीय जाडो मौसममा ६ महिना बेसी र गर्मी मौसममा ६ महिना गाउँमै बस्ने गरेका छन् । पुस माघमा हिमपातले उक्त गाउँ पुरै ढाक्ने गरेको छ । जाडाले गर्दा मंसिरमा गाउँ छोडेका उनीहरु चैत वैशाखमा गर्मी लागेसँगै घर फर्किने गरेका छन् ।
यसैबीच, मुगु गाउँमा रहेको सिमा प्रहरी चौकीमा कार्यरत प्रहरी पनि जाडो कटाउन तल पूलु प्रहरी चौकीतर्फ झरेका छन् ।
